煲中窺人

今晚，我突然之間想食煲仔飯，入座之後冇耐，我便比一陣香味所吸引，原來係隔離位一對男女喺度食薯條炸雞。正正係呢陣香味，使我有咗一次嘆為觀止嘅經歷。

煲仔飯嘅等待時間總是格外漫長，都不算刻意去聽，隔離位的對話有一句冇一句咁傳入我耳中。啊係啦，我突然諗起我啱坐定時男生一句「這家店跟香港菜好像啊。」終於我的餐到啦，準備起筷時聽到一句「好！這些就交給你啦！」我作為一個旁觀者都聽得出呢句說話好明顯係一句客套話嚟嘅，坐喺男生對面嘅嗰位女士梗係比我明得多，同佢客氣返，呢位男士可能冇明白女人嘅心思，「那我就不客氣啦！」講罷便大快朵頤起來。

此時女仔好似唔係咁開心，有意無意咁喺度整佢嗰碗飯，但又唔食。然而個男仔食得正認真，雙手把住個雞翼，塊面好似要黐喺枱面咁樣。與此同時，佢手機入面唔知咩節目播得正大聲，我估部劇正係高潮囉，唔怪之得我哋嘅男主角唔理女主角感受啦。

我費事睬佢哋，自顧自食起飯來。但男生都幾引人注目，食下食下我個心思又俾佢吸走…唔知講緊乜，淨係聽到男生用好質疑嘅語氣問女仔「快递要送到你楼下？」之類，女仔用幾個語氣詞應付，佢竟然死不鬆口，又多質問對方幾句。對話好似進行唔到，期間男仔嗌咗服務員幾次，我未聽到佢要啲乜，個語氣態度唔算惡劣，但佢個牙擦樣都好乞人憎。

眼見飯食完，又傾唔到計，係時候埋單離開，「給你一個買單的機會。」嘩男仔竟然咁講我真係佩服佢啦！之但係我顧住食飯未見到女仔表情。未黑晒口面我都同佢姓！女仔去埋單，男仔又嗌服務員嚟，今次我聽到佢係要一次性筷子，經已食完要筷子做咩啫？條友心思都幾騎呢😂

仲未完！ ！女仔買單返嚟，「就這樣的店也不倒閉？」嘩大佬你喺度約緊會喎講咩先得㗎？女仔未出聲，準備走，我哋嘅大佬又重複咗一次 「就這樣的店也不倒閉？」，女仔仍然未出聲，出咗店門口。

最後，佢攞起車匙，我望向佢，都算身光頸靚啦。